Kryeministri Edi Rama ka hedhur një deklaratë të fortë që ka shkaktuar reagime dhe shqetësim në opinionin publik, duke paralajmëruar mbylljen e Radio Televizionit Shqiptar (RTSH) për një afat të pacaktuar, deri në realizimin e asaj që ai e quan një reformim total të institucionit.
Gjatë fjalës së tij në mbledhjen e Grupit Parlamentar të Partisë Socialiste, Rama u shpreh se përpjekjet për reformimin e televizionit publik kanë dështuar ndër vite dhe se RTSH, sipas tij, nuk përmbush më misionin e një mediaje publike në shërbim të qytetarëve.“E vërteta historike është se kemi tentuar të krijojmë kushtet që televizioni publik të reformohet, por kemi dështuar. Deri tani bilanci i tij është një ‘dështim i suksesshëm’, domethënë nga borxhi në borxh, në mospërfillje”, deklaroi Rama.
Kryeministri shkoi edhe më tej, duke theksuar se Shqipëria, sipas tij, nuk ka aktualisht një televizion publik funksional. Ai kujtoi përvojën e tij personale me RTSH-në, duke ironizuar mungesën e ndikimit dhe audiencës së këtij institucioni.“Nuk e kemi një televizion publik në Shqipëri; hera e fundit kur e kam parë ka qenë në vitin 1990, para përmbysjes së sistemit. Kam shkuar i ftuar, por nuk kam parë as veten. Janë të vetmet intervista ku nuk kam marrë asnjë mesazh”, u shpreh Rama.
Në deklaratën e tij, kreu i qeverisë paralajmëroi prerjen e fondeve publike për RTSH-në, duke nënvizuar se taksat e shqiptarëve nuk do të përdoren më për një institucion që, sipas tij, nuk justifikon ekzistencën.“U kam thënë: mbylleni. S’kemi për të dhënë asnjë lek nga taksat e shqiptarëve, deri kur t’i meritojë”, theksoi ai.
Rama bëri të qartë se të gjitha opsionet janë tashmë në tryezë për të ardhmen e RTSH-së: nga mbyllja e përkohshme apo përfundimtare, te privatizimi apo partneriteti publik-privat.“Çdo opsion duhet të jetë në tryezë: edhe mbyllja përfundimtare, edhe privatizimi, edhe partneriteti, edhe çdo gjë përveç kësaj që është sot”, përfundoi Kryeministri.
Deklaratat e Ramës hapin një debat të fortë mbi të ardhmen e medias publike në Shqipëri, rolin e saj demokratik dhe fatin e qindra punonjësve të RTSH-së, ndërsa pritet reagimi zyrtar i institucionit dhe aktorëve të tjerë politikë e mediatikë.
