Një ngjarje e rëndë sigurie ka tronditur sistemin penitenciar shqiptar më 13 janar 2026, kur i paraburgosuri Altin Ndoci u arratis nga Spitali Rajonal i Durrësit, gjatë një vizite mjekësore të planifikuar nga Institucioni i Ekzekutimit të Vendimeve Penale (IEVP) Durrës.
Sipas sqarimit zyrtar të Drejtorisë së Përgjithshme të Burgjeve, Ndoci ishte i akomoduar në IEVP Durrës që prej datës 20 maj 2020, me masë sigurimi “arrest me burg”, e konfirmuar në disa vendime të Gjykatës së Posaçme kundër Korrupsionit dhe Krimit të Organizuar.
Altin Ndoci akuzohet për një sërë veprash penale të rënda, përfshirë:
Vrasje në rrethana cilësuese kundër dy ose më shumë personave
Armëmbajtje pa leje
Organizatë kriminale dhe grup i strukturuar kriminal
Këto akuza e bëjnë atë një nga personat me rrezikshmëri të lartë shoqërore, çka e rëndon edhe më shumë ngjarjen e arratisjes.
Më 13 janar 2026, pas një konsultë me mjekun e IEVP-së, u rekomandua që Ndoci të kryente vizitë te mjeku kirurg në Spitalin Rajonal Durrës. Vizita u planifikua të kryhej dhe të përfundonte brenda të njëjtës ditë.
Pas vizitës nga mjeku kardiolog, Ndoci u la nën mjekim dhe u kërkua një rikontroll pas dy orësh. Gjatë kohës që po merrte trajtim mjekësor, ai ka kërkuar të shkojë në tualet. Në këtë moment, sipas raportimeve zyrtare, ka kundërshtuar dhe goditur punonjësit e Policisë së Burgjeve, duke përfituar nga situata për t’u arratisur.
Verifikimet paraprake kanë zbuluar shkelje serioze:
IEVP Durrës nuk ka njoftuar Drejtorinë e Përgjithshme të Burgjeve
Nuk është informuar Komisariati i Policisë Durrës
Nuk është raportuar as planifikimi dhe as realizimi i vizitës mjekësore
Nuk janë respektuar procedurat standarde të shoqërimit të të paraburgosurve
Këto shkelje bien ndesh me aktet nënligjore në fuqi dhe kanë ngritur dyshime të forta për neglizhencë, paaftësi ose përgjegjësi të drejtpërdrejtë institucionale.
Me urdhër të Drejtorit të Përgjithshëm të Burgjeve, është pezulluar i gjithë zinxhiri komandues i IEVP Durrës, përfshirë drejtorin, shefin e policisë, drejtues të shërbimit shëndetësor dhe disa punonjës të Policisë së Burgjeve.
Ndërkohë, në bashkëpunim me Shërbimin e Kontrollit të Brendshëm dhe Prokurorinë e Durrësit, është vendosur ndalimi i 8 punonjësve, përfshirë komisarë, inspektorë dhe kryeinfermierin e institucionit..
Drejtoria e Përgjithshme e Burgjeve ka bërë të ditur se hetimet do të vijojnë për të zbardhur plotësisht rrethanat e arratisjes dhe për të identifikuar përgjegjësitë individuale dhe institucionale, ndërsa paralelisht po merren masa për forcimin e protokolleve të sigurisë në të gjitha IEVP-të në vend.
Ngjarja ka rikthyer në vëmendje problematikat e sigurisë në shoqërimet spitalore të të paraburgosurve dhe ka ngritur pikëpyetje serioze mbi funksionimin e zinxhirit komandues dhe kontrollin institucional në burgjet shqiptare.
