Gjykata Penale e Tiranës ka vendosur se arrestimi i dy efektivëve të Komisariatit Nr. 3, Bruno Cara dhe Arshim Zajmi, ka qenë i paligjshëm. Për pasojë, ndaj tyre nuk është caktuar asnjë masë sigurimi, duke i rikthyer menjëherë në gjendje të lirë.
Dy policët ishin ndaluar nën dyshimin se kishin ndihmuar Muci Shaljanin të bëhej bashkëpunëtor/agjent i Agjencisë së Mbikëqyrjes Policore (AMP). Prokuroria pretendonte se veprimet e tyre kishin ndikuar në procesin e identifikimit dhe përdorimit të Shaljanit si burim informacioni.
Ngjarja merr më shumë peshë për shkak se Muci Shaljani u plagos rëndë dhe më pas humbi jetën, pas atentatit të ndodhur në zonën e Rinasit, ku u vra gjithashtu Gilmando Dani. Hetimet për atentatin vijojnë, ndërsa autoritetet po verifikojnë të gjitha pistat që mund të lidhen me rolin e Shaljanit si bashkëpunëtor i strukturave të hetimit të policisë.
Gjykata, pas shqyrtimit të dokumentacionit dhe provave, arriti në përfundimin se arrestimi i dy efektivëve nuk ishte kryer në përputhje me procedurat ligjore, duke e konsideruar ndalimin e tyre të pajustifikuar.
Ndërkohë, Prokuroria pritet të vendosë mbi vijimin e hetimeve ndaj Cara dhe Zajmit, pavarësisht faktit se ata nuk do të mbahen nën masë sigurimi.
Çështja vijon të mbetet në vëmendjen e publikut, si për shkak të dyshimeve mbi mënyrën e menaxhimit të informacionit brenda strukturave policore, ashtu edhe për lidhjen e saj me atentatin e rëndë në Rinas.
