Kryetari i Partisë Demokratike, Sali Berisha, ka hedhur akuza të forta ndaj kryeministrit Edi Rama dhe biznesmenit Ergys Agasi, i arrestuar së fundmi në kuadër të hetimeve të SPAK për dosjen e AKSHI-t.
Në një konferencë për mediat, Berisha e cilësoi Agasin si një prej personave me ndikim të madh pranë kryeministrit Rama, duke pretenduar se ai kishte rol në çështje të rëndësishme të sigurisë dhe emërimeve në qeveri.
Sipas Berishës, Agasi ka pasur ndikim të drejtpërdrejtë mbi strukturat shtetërore dhe shërbimet informative.“Ergys Agasi ishte dhe është personi, që sipas pohimeve verbale, ndryshonte, emëronte, çemëronte ministrat e Brendshëm dhe kishte një kontroll fjollë mbi SHIK-un”, deklaroi Berisha.
Ai ngriti gjithashtu akuza lidhur me marrëdhëniet e Agasit me persona në drejtimin e strukturave të inteligjencës shqiptare, duke pretenduar se kjo marrëdhënie mund të ketë ndikuar në funksionimin e institucioneve të sigurisë.
Berisha: Agasi kontrollonte të dhënat përmes AKSHI-t
Një pjesë e deklaratës së Berishës u përqendrua te AKSHI dhe mënyra se si, sipas tij, është ushtruar kontrolli mbi të dhënat digjitale.
Berisha pretendoi se përmes strukturave të AKSHI-t, Agasi kishte mundësi të kontrollonte të dhënat në internet të qytetarëve shqiptarë dhe shtetasve të huaj që ndodheshin në Shqipëri.
Këto janë akuza të bëra nga Berisha, ndërsa nuk përbëjnë një konstatim të provuar gjyqësisht.
“Rama ishte arkitekti i interiorit të vilës së Agasit”
Në deklaratën e tij, Berisha foli edhe për vilën e Ergys Agasit në Durrës.
Ai pretendoi se Edi Rama kishte pasur rol në arredimin e brendshëm të vilës së biznesmenit.“Ergys Agasi ka pasur de facto, jo de jure, si arkitekt të interiorit, Edi Ramën për vilën e tij të ndërtuar pikërisht në zonën e ndërtesave qeveritare në Durrës”, tha Berisha.
Kreu i PD-së shtoi se Partia Demokratike, sipas tij, i kishte denoncuar më herët vizitat dhe angazhimin e Ramës në këtë pronë.
Agasi u arrestua në Durrës
Deklaratat e Berishës vijnë një ditë pas arrestimit të Ergys Agasit në zonën e Plepave në Durrës.
Agasi është një prej personave të hetuar nga SPAK në dosjen që lidhet me tenderët e AKSHI-t. Në të njëjtën çështje janë nën hetim edhe persona të tjerë, mes tyre biznesmeni Ermal Beqiraj dhe ish-drejtoresha e AKSHI-t, Mirlinda Karçanaj.
Hetimet e SPAK lidhen me dyshime për grup të strukturuar kriminal, manipulim të tenderëve publikë dhe vepra të tjera penale.
Lexo edhe:
