Aksident tragjik në Krutje, humb jetën drejtuesi i motoçikletës

Një aksident i rëndë rrugor është regjistruar në zonën e njohur si “Pushimi i Shoferit” në Krutje, ku një motoçikletë është përplasur me një automjet tip “Volkswagen Caddy”.

Sipas informacioneve paraprake, drejtuesi i motoçikletës dyshohet se ka tentuar një parakalim në momentin e përplasjes me mjetin, i cili po kthehej për në banesë. Përplasja ka qenë tepër e fortë, duke i shkaktuar plagë të rënda motoristit.

I plagosuri është transportuar me urgjencë në spital, por nuk ka mundur t’i mbijetojë plagëve të marra, duke ndërruar jetë pak më vonë.

Në vendngjarje kanë mbërritur forcat e policisë, të cilat po punojnë për disiplinimin e trafikut dhe kryerjen e veprimeve procedurale për zbardhjen e plotë të rrethanave të aksidentit.