Shqipëria renditet ndër vendet me nivelin më të lartë të gatishmërisë për të luftuar për vendin në mesin e anëtarëve të NATO-s.
Sondazhi i publikuar nga Instituti Amerikan “Foreign Policy Research” fakton se 69% e shqiptarëve do të ishin të gatshëm të luftonin për vendin e tyre, duke e vendosur Shqipërinë në vendin e dytë pas Turqisë (88%), dhe përpara vendeve si Suedia, Finlanda dhe Mali i Zi, shkruan Ministria e Mbrojtjes.
Artikulli i “Foreign Policy Research Institute“:
Nëse do të shpërthente një luftë, a do të ishit të gatshëm të luftonit për vendin tuaj?
Gjatë viteve të fundit, gatishmëria për të luftuar ka tërhequr vëmendje më të madhe, veçanërisht që nga pushtimi i plotë i Ukrainës nga Rusia në vitin 2022. Kjo luftë nënvizoi rëndësinë e moralit të qytetarëve në rezistencën ndaj një pushtuesi. Ukrainasit ngritën një rezistencë të fortë kundër forcës pushtuese. Nëse shoqëria ukrainase thjesht do ta kishte pranuar sulmin e Rusisë, lufta mund të kishte mbaruar më shpejt, me Ukrainën që do të humbiste, përcjell Faxweb.
Po gatishmëria për të luftuar për shtetet anëtare të NATO-s?
Për ta gjetur këtë, pyetja e gatishmërisë për të luftuar u bë, për herë të parë, në një sondazh të vetëm në të gjitha shtetet anëtare të NATO-s.
Një sondazh i porositur nga Universiteti Riga Stradins, në bashkëpunim me Qendrën për Studime Gjeopolitike të Rigës, u krye në shtator dhe tetor 2025.
Me më shumë se 31,000 të anketuar, sondazhi ishte përfaqësues në nivel kombëtar në secilin vend.
Sipas sondazhit, pesë vendet me përqindjen më të lartë të qytetarëve të gatshëm të luftojnë për vendin e tyre janë:
Turqia (88%), Shqipëria (69%), Suedia (66%), Finlanda (64%) dhe Mali i Zi (63%), përcjell Faxweb.
10 vendet e para që plotësojnë janë Greqia (63%), Norvegjia (61%), Lituania (52%), Polonia dhe Sllovenia (49%).
Gatishmëria e fortë për të luftuar në Turqi dhe shtetet nordike, veçanërisht Suedia dhe Finlanda, nuk është për t’u habitur. Studimet e mëparshme e vërtetojnë këtë. Rasti turk është shpjeguar nga konteksti gjeopolitik i paqëndrueshëm, dhe rasti nordik nga dëshira për të ruajtur stilin e tyre të jetesës, i kombinuar me kërcënimet nga Rusia.
Është interesante se lufta e Rusisë nuk ka ndikuar në vullnetin e fqinjëve të saj më të afërt dhe historikisht më të prekur, shtetet baltike.
Lituania rënditet me 52%, ndër 10 vendet e para në NATO. Ndërsa Estonia dhe Letonia renditen më poshtë me 45 dhe 37%.
Vendet me përqindjet më të ulëta të qytetarëve të gatshëm të luftojnë për vendin e tyre në NATO janë Italia, Sllovakia (të dyja 25%), Gjermania (27%), Holanda (30%), Hungaria dhe Republika Çeke (33%). Kjo nuk është për t’u habitur pasi këto vende nuk përballen me ndonjë kërcënim të menjëhershëm ushtarak.
Gjithashtu, studimet e mëparshme kanë zbuluar se gatishmëria për të luftuar tradicionalisht ka qenë më e ulët në Gjermani dhe Itali, veçanërisht për shkak të përvojave të tyre në Luftën e Dytë Botërore dhe stigmës që i ka shoqëruar.
Sondazhet si kjo nuk garantojnë që njerëzit do të vepronin siç janë shprehur në rast nevoje. Në jetën reale, faktorë të tillë si shpejtësia dhe shkalla e konfliktit, efektiviteti i vetëmbrojtjes ushtarake, mbështetja e vendeve aleate dhe rrethanat personale dhe familjare mund të ndikojnë në mosgatishmëri për të luftuar për vendin.
Gjetjet nga ky sondazh duhet t’i kujtojnë NATO-s dhe shteteve anëtare të saj se perceptimet e kërcënimit dhe gatishmëria e popullatave për të mbështetur vendet dhe forcat e tyre të armatosura ndryshojnë ndjeshëm. Ndërsa disa shtete duhet të nxjerrin mësime nga të tjerët.
