Punimet për rrugën Janinë–Kakavijë po vijojnë në rajonin e Epirit, në Greqi. Projekti, me një buxhet prej rreth 310 milionë eurosh, synon të përmirësojë lidhjen rrugore me kufirin shqiptar dhe të lehtësojë lëvizjen e udhëtarëve dhe mallrave mes dy vendeve.
Sipas të dhënave të publikuara për projektin, pas përfundimit të punimeve, udhëtimi nga Janina deri në pikën kufitare të Kakavijës pritet të zgjasë rreth 35–40 minuta. Përfundimi i aksit parashikohet në dhjetor të vitit 2029.
Ku po zhvillohen punimet?
Sipas pamjeve të fundit nga kantieri, punimet janë përqendruar në zonat e Kosmirës dhe Asvestochorit, si dhe në nyjën që do të lidhë aksin e ri me autostradat Ionia Odos dhe Egnatia Odos.
Në këtë nyje parashikohet ndërtimi i një ure rreth 560 metra të gjatë, ndërsa vijojnë edhe punimet për sistemimin e terrenit përgjatë gjurmës së rrugës.
Projekti ndahet në dy seksione kryesore. I pari, nga Janina në Kalpaki, ka gjatësi 46.4 kilometra dhe përfshin gjashtë nyje rrugore në nivele të ndryshme. Pjesa e dytë parashikon përmirësimin e 23.1 kilometrave të rrugës ekzistuese nga Kalpaki deri në pikën kufitare të Kakavijës.
Pjesë e korridoreve të transportit europian
Rruga Janinë–Kakavijë është pjesë e korridorit europian të transportit Orient/Mesdheu Lindor dhe lidhet me projektin më të gjerë të njohur si “Korridori Blu”, që shtrihet nga Trieste në Itali deri në Kalamata të Greqisë.
Aksi do të jetë pjesë e lidhjes rrugore veri–jug në Greqinë perëndimore. Projekti përfshin edhe zgjerimin e Ionia Odos, me segmente të konceptuara si rrugë ekspres me konfigurim 2+1 korsi, dhe jo si autostradë e plotë në të gjithë gjatësinë.
Nga Antirrio në Kakavijë për rreth 2 orë e 15 minuta
Sipas parashikimeve të projektit, udhëtimi përgjatë aksit prej rreth 264 kilometrash, nga Antirrio drejt Kakavijës, përmes Messolonghit, Agrinios, Artës dhe Janinës, pritet të zgjasë afërsisht 2 orë e 15 minuta.
Përveç shkurtimit të kohës së udhëtimit, projekti synon të përmirësojë lidhjen e zonave malore të Epirit, të lehtësojë transportin e mallrave dhe të nxisë turizmin ndërmjet Greqisë dhe Ballkanit.
Kryeministri grek Kyriakos Mitsotakis mori pjesë në ceremoninë e nënshkrimit të kontratës në Kalpaki në dhjetor 2024. Në atë rast, ai e cilësoi projektin si një urë miqësie mes Greqisë dhe Shqipërisë, duke nënvizuar edhe rëndësinë e tij për minoritetin kombëtar grek në Shqipëri.
Kakavija është një nga pikat kryesore të kalimit kufitar mes dy vendeve. Me përfundimin e projektit, autoritetet greke synojnë të përmirësojnë aksesin drejt kufirit dhe të forcojnë lidhjet tregtare e turistike me Shqipërinë.
Lexo edhe
Trotuare të shkulura, xhama të thyer, zyra të djegura. Rruga e Durrësit pas protestës
Qafa e Buallit–Martanesh, rruga 22 milionë euro që u shtrua dy herë (me letra) me asfalt!
