Policia e Durrësit ka finalizuar fazën e dhjetë të operacionit të koduar “STORM”, një aksion i shtrirë në kohë për goditjen e shfrytëzimit për prostitucion dhe veprimtarive të tjera kriminale të lidhura me të.

Pas disa javësh hetimesh të ndjekura me metoda proaktive, Seksioni për Hetimin e Trafiqeve, në bashkëpunim me Seksionin e Mbështetjes Operacionale dhe Prokurorinë, arrestoi dy shtetase braziliane dhe procedoi penalisht një person tjetër.

Reklame

Arrestimet dhe personat e proceduar

Në pranga ranë:

B. B., 24 vjeçe, lindur dhe banuese në Brazil

H. D., 21 vjeçe, lindur dhe banuese në Brazil

Ndërsa u procedua në gjendje të lirë:

K. M., 22 vjeç, banues në Durrës, për veprën penale “Prostitucioni”.

Policia njoftoi se dy vajzat braziliane kishin marrë me qira një apartament në lagjen nr. 2 të Durrësit, të cilin e përdornin për ushtrim prostitucioni dhe konsumim të lëndëve narkotike.

Gjatë operacionit, të dyja shtetaset refuzuan të hapnin derën e apartamentit. Forcat zjarrfikëse ndërhynë për hapjen e saj, duke i mundësuar policisë që të hyjë dhe të sekuestrojë materiale të rëndësishme provuese.

Në cilësinë e provës materiale u sekuestruan:

Dy pasaporta të shtetaseve braziliane

Shuma parash në euro dhe lekë

3 aparate celularë

Një bllok shënimesh

Karta SIM

Dy sasi të vogla lënde narkotike (kanabis dhe çokollatë me përmbajtje THC)

Materialet iu referuan Prokurorisë së Durrësit për hetime të mëtejshme.

Operacioni “STORM” vijon me faza të tjera për goditjen e veprimtarive kriminale të prostitucionit dhe trafikimit në zonën e Durrësit.

Reklame