Kryeministri Edi Rama ka vendosur sërish këtë të mërkurë “karriget e dialogut” para Kryeministrisë, duke përsëritur ftesën për protestuesit që të ulen dhe të diskutojnë, në një kohë kur protestat dhe përplasjet në Tiranë vijojnë të mbajnë të tensionuar situatën politike.
Përmes një mesazhi publik, Rama ka dënuar aktet e dhunës, duke theksuar se pakënaqësitë dhe problemet e qytetarëve nuk e justifikojnë atë. Sipas tij, e drejta për të protestuar është e pamohueshme, por dhuna përbën vepër të ndëshkueshme.
“Dje dialogu mori përgjigjen e dhunës. Sot dialogu është këtu përsëri”, u shpreh kryeministri, duke ftuar protestuesit të distancohen nga aktet e dhunshme.
Rama deklaroi se është i gatshëm të dialogojë me këdo që ka mendime të ndryshme nga të tijat, ndërsa theksoi se zgjidhja e problemeve kërkon punë dhe orientimin e të ardhurave drejt nevojave të qytetarëve.
Paralajmërimi për dëmtuesit e pronës
Në mesazhin e tij, kreu i qeverisë paralajmëroi edhe pasoja ligjore dhe financiare për personat që dëmtojnë pronën publike apo atë private.
“Distancohuni nga dhuna dhe çdo dhunues do të marrë përgjigje. Përgjigja do të jetë konstante, ligjore dhe financiare. Kush dëmton pronën e përbashkët dhe pasurinë e tjetrit do të paguajë”, deklaroi Rama.
Vendosja e sërishme e karrigeve para Kryeministrisë vjen në kuadër të përpjekjes së kryeministrit për të paraqitur dialogun si alternativë ndaj përplasjeve. Mbetet për t’u parë nëse protestuesit do t’i përgjigjen ftesës së tij, në një situatë ku përplasjet mes tyre dhe policisë kanë shoqëruar ditët e fundit protestat në kryeqytet.
Lexo edhe
Parashikimi i motit për ditën e sotme. Me vranësira dhe reshje shiu
Horoskopi e mërkurë 21 tetor, parashikimi i yjeve për secilën shenjë
