Arresti në shtëpi i drejtoreshës së Shërbimit Informativ Shtetëror, Vlora Hyseni, ka hapur një debat të fortë politik në Kuvend, ndërsa mazhoranca duket se eshte gjetur e pa pergatitur per kete zhvillim mjaft te rende, duke shtuar edhe nje tjeter skandal ne bemat e saj qeverisese.
Hyseni është vendosur nga GJKKO nën masën “arrest në shtëpi” dhe është pezulluar nga detyra, në kuadër të hetimeve të SPAK që lidhen me dosjen e AKSHI-t dhe hetimet ndaj biznesmenit Ergys Agasi. Sipas raportimeve, ndaj saj dyshohet për “përkrahje të autorit të krimit” dhe “zbulim të akteve ose të të dhënave sekrete”.
Në momentin kur vendimi u bë publik, kryeministri Edi Rama ndodhej në Nju Jork për punimet e Asamblesë së Përgjithshme të OKB-së. Më pas, Rama reagoi duke njoftuar shkarkimin e menjëhershëm të Hysenit nga detyra dhe duke deklaruar se askush nuk është mbi ligjin.
Por debati politik në Tiranë nuk u mbyll me kaq.
Xhafaj: “Kjo ndodh rëndom në botën normale”
Fatmir Xhafaj, kryetar i një prej komisioneve parlamentare që u përball me këtë çështje, e cilësoi masën ndaj Hysenit si një zhvillim që, sipas tij, tregon funksionimin e shtetit të së drejtës.
“Ndodh rëndom në botën normale, në vendet demokratike, në vendet ku vepron shteti i së drejtës”, tha Xhafaj, duke iu referuar edhe Shteteve të Bashkuara.
Ai argumentoi se raste të tilla janë pjesë e funksionimit të një shteti të konsoliduar dhe se fakti që drejtësia mund të marrë masa edhe ndaj një drejtuesi të një institucioni të rëndësishëm është tregues i pavarësisë së saj.
Deklarata u prit me kritika nga opozita, e cila e konsideroi situatën jo si një shembull normaliteti, por si një zhvillim që kërkon përgjegjësi politike për mënyrën se si Hyseni u emërua në krye të SHISH-it.
Çuçi: “Duhet të ndihemi krenarë”
Në Komisionin e Punëve të Brendshme, diskutimi mori një tjetër drejtim.
Deputeti socialist Bledi Çuçi i kapur “mat” nga ky zhvillim, tha se përgjegjësia është personale dhe se nuk mund të nxirren përfundime për fajësinë e një personi pa përfunduar procesi gjyqësor.
“Duhet të krenohemi që kemi ngritur një shtet ku pushtetet brenda Republikës janë tërësisht të pavarura dhe balancojnë njëra-tjetrën”, deklaroi Çuçi.
Sipas tij, zhvillimet e fundit tregojnë se institucionet e drejtësisë po veprojnë në mënyrë të pavarur.
Në të njëjtën linjë, Çuçi kërkoi që të pritet përfundimi i hetimit dhe zbardhja e plotë e çështjes përpara se të vendoset përgjegjësi politike apo penale mbi personat e përfshirë.
Opozita kërkon llogari për emërimin
Në krahun tjetër, opozita e ka lidhur çështjen drejtpërdrejt me vendimin politik për emërimin e Hysenit në krye të SHISH-it.
Kritika kryesore është se përgjegjësia politike nuk mund të zhduket vetëm duke pritur përfundimin e procesit gjyqësor. Sipas opozitës, duhet të shqyrtohet edhe se si u bë përzgjedhja dhe emërimi i drejtueses së institucionit më të rëndësishëm të inteligjencës në vend.
Debati bëhet edhe më i ndjeshëm për shkak të natyrës së akuzave të bëra publike nga SPAK. Bëhet fjalë pikërisht për dyshime që lidhen me informacionin sekret shtetëror.
Nga AKSHI te SHISH: si mbërriti hetimi te Hyseni?
Hetimi ndaj Hysenit është pjesë e zhvillimeve të reja të dala nga dosja e AKSHI-t, ku një nga emrat qendrorë është biznesmeni Ergys Agasi.
SPAK ka zgjeruar hetimin dhe në kuadër të operacionit janë kryer kontrolle edhe në banesën e ish-drejtorit të Përgjithshëm të Policisë, Ilir Proda, si dhe në ambiente të personave të tjerë.
Sipas raportimeve të publikuara për çështjen, materialet e sekuestruara gjatë hetimeve ndaj Agasit kanë çuar prokurorët drejt hallkave të tjera, duke përfshirë edhe Hysenin.
Pikërisht këtu qëndron edhe pesha e zhvillimit: hetimi nuk është thjesht për një zyrtare të lartë të administratës, por për drejtuesen e institucionit që administron dhe trajton informacionet më sensitive të sigurisë kombëtare.
“Normalitet” apo krizë politike?
Për mazhorancën, fakti që një drejtues i lartë mund të vihet nën masë sigurie është dëshmi se drejtësia funksionon.
Për opozitën, e njëjta ngjarje ngre pyetjen e kundërt: kush mban përgjegjësi politike kur një person i emëruar në krye të SHISH-it përfundon nën hetim për akuza që lidhen me sekretet shtetërore?
Këto janë dy lexime krejt të ndryshme të të njëjtit zhvillim.
Njëra palë kërkon që të pritet drejtësia. Tjetra kërkon që, paralelisht me drejtësinë, të nisë edhe një proces parlamentar për të shqyrtuar vendimmarrjen që çoi Hysenin në krye të SHISH-it.
Në fund, çështja penale do të përcaktohet nga drejtësia. Por pyetja politike mbetet e hapur: nëse përgjegjësia është personale, kush mban përgjegjësi për zgjedhjen e personit që drejtoi shërbimin sekret të vendit?
Lexo edhe:
Rama shkarkoi kreun e SHISH, Bardhi: Zgjidhja është dorëheqja dhe ndjekja penale e kryeministrit
Berisha: Ergys Agasi dhe Vlora Hyseni takoheshin dy herë në javë poshtë shtëpisë time!
