Gentian Çipi, lindur në Korçë dhe banues në Dishnicë të Korçës, është i burgosuri i arratisur mbrëmjen e djeshme në mënyrë spektakolare nga spitali i Serres në Greqi.
41-vjeçari nga Korça rezulton person me precedentë të rëndë penalë në Shqipëri dhe në Greqi.
Konkretisht, ai rezulton i dënuar në Shqipëri, në korrik 2024, me 2 vjet burgim për veprën penale “Shkatërrimi i pronës me zjarr”, e kryer në bashkëpunim dhe në rrethana rënduese.
Fillimisht, ai ishte hetuar nën masën “Arrest në burg”, por më pas gjykata e kishte zbutur masën në “Ndalimi i daljes jashtë shtetit” dhe “Garancia pasurore”.
Ai është akuzuar për djegien e një automjeti më 24.04.2023, në lagjen 13, në rrugën “Loni Grazhdani”, në Korçë.
Më herët, në janar 2023, në kuadër të operacionit “Fijet”, policia procedoi Gentian Çipin, pasi pranë banesës së tij u gjetën kamera të vendosura në mënyrë të paligjshme.
Më 3 shtator 2024, Gentian Çipi hapi zjarr në Pylaia të Selanikut, duke tentuar të vriste një 25-vjeçar grek jashtë një kantine. Greku u plagos me 3 plumba, por arriti t’u mbijetonte plagëve, ndërsa Çipi arriti të arratisej.
Policia greke arriti ta identifikonte Cipin dhe organizoi një operacion për kapjen e tij në shtator 2025.
Gjatë operacionit u arrestuan edhe Enea Basholli, 31 vjeç, dhe Kleo Topa, 24 vjeç, edhe këta nga Korça.
Sipas policisë greke, Gentian Çipi rezulton të jetë kreu i një grupi kriminal që merret me trafik droge dhe veprime të dhunshme.
Gjatë operacionit për kapjen e tyre në Selanik, Çipi dhe Topa nuk iu bindën urdhrit të policisë, por shtuan shpejtësinë e mjetit me të cilin lëviznin dhe kryen manovra të rrezikshme, duke përplasur një automjet të policisë.
Ata braktisën mjetin dhe u larguan në këmbë, por u kapën më pas. Pak orë më vonë, në zonën e Halkidikisë, ra në pranga edhe Enea Basholli.
Gjatë kontrolleve të policisë greke u gjetën dhe u sekuestruan 1 kallashnikov me 30 fishekë, 3 pistoleta, një silenciator, rreth 31 kg marijuanë, një pasaportë false, një patentë false, 23 mijë e 350 euro, celularë dhe 3 automjete. /SYRI.net
RAPORTIMET E MEDIAVE GREKE PER ARRATISJEN E SHQIPTARIT
Nga Michalis Tezaris, NEWPOST
Bëhet fjalë për një 40-vjeçar me origjinë shqiptare, i cili mbahej në burgun e Nigritës dhe të premten në mbrëmje u transferua në spital, pasi deklaroi se nuk ndihej mirë. Atje, thuhet se operacioni për lirimin e tij ishte organizuar tashmë, me bashkëpunëtorët e tij që e befasuan eskortën brenda pak çastesh.
U akuzua për të shtënë me armë në një kantinë në Pilaia
I arratisuri kishte qenë në qendër të një hetimi të madh policor për tentativën e vrasjes së një 25-vjeçari, e cila ndodhi më 3 shtator 2024 në Pilaia të Selanikut.
Sipas Policisë Greke, ai dyshohet se qëlloi me armë të riun jashtë një biznesi të shërbimit ushqimor – një kantinë – duke e plagosur në gjoks dhe në dorë. Në vendngjarje u gjetën tre gëzhoja.
Arrestimi një vit më vonë
Policët arritën të binin në gjurmët e tij një vit më vonë. Më 8 shtator 2025, ai u konstatua së bashku me një 23-vjeçar, duke lëvizur me një makinë në një zonë të Selanikut. Kur policët tentuan t’i kontrollonin, ata nuk u ndalën dhe shtuan shpejtësinë. Gjatë arratisjes së tyre u përplasën me një automjet të shërbimit, braktisën makinën dhe tentuan të largoheshin në këmbë, përpara se më në fund të ndaloheshin dhe të arrestoheshin.
Në të njëjtën çështje ishte arrestuar edhe një person i tretë, ndërsa të tre ishin akuzuar, sipas rastit, për organizatë kriminale, tentativë vrasjeje, drogë, armë, falsifikim dokumentesh, mosbindje dhe dhunë ndaj punonjësve të policisë. Gjatë kontrolleve ishin sekuestruar, ndër të tjera, një pistoletë me fishekë, më shumë se tre kilogramë kanabis, 23.350 euro dhe dokumente të falsifikuara.
Gjuetia pas arratisjes
Një vit pas arrestimit të tij, 40-vjeçari ndodhet sërish në qendër të një operacioni të madh policor. Autoritetet po kërkojnë si atë, ashtu edhe dy bashkëpunëtorët që dyshohet se organizuan arratisjen e tij, ndërsa vendimtar konsiderohet edhe fakti që gjatë operacionit ata u morën armët policëve të eskortës.
Plani, mënyra se si autorët e dinin se i arrestuari do të transferohej në spital, si dhe nëse shqetësimi shëndetësor që ai deklaroi ishte pjesë e planit të arratisjes, tashmë janë nën lupën e autoriteteve.
