Dhjetëra shqiptarë të komunitetit në Norvegji janë mbledhur në një tubim solidarizues, duke iu bashkuar protestave që po zhvillohen në Shqipëri kundër projektit të planifikuar në Zvërnec.
Me flamuj kuqezi dhe pankarta në duar, pjesëmarrësit shprehën mbështetjen e tyre për protestuesit në Shqipëri, duke kërkuar ndalimin e projektit dhe dëgjimin e zërit të qytetarëve.
Tubimi në Norvegji vjen në vazhdën e protestave të organizuara nga diaspora shqiptare në disa vende europiane, ku komunitetet shqiptare kanë shprehur kundërshtimin e tyre ndaj projektit dhe solidaritetin me protestuesit në atdhe.
Organizatorët theksuan se reagimi i diasporës synon të përcjellë një mesazh mbështetjeje për qytetarët që prej ditësh protestojnë në Shqipëri, ndërsa nënvizuan rëndësinë e angazhimit të shqiptarëve kudo që ndodhen për çështje që lidhen me interesin publik dhe pasuritë natyrore të vendit.
Tubimi u zhvillua në mënyrë paqësore, ndërsa pjesëmarrësit deklaruan se do të vijojnë të mbështesin protestat dhe nismat qytetare që lidhen me mbrojtjen e Zvërnecit.
