Urgjenca Polivalente e Qendrës Spitalore Universitare “Nënë Tereza” vijon të përballet me një fluks të lartë pacientësh, ku çdo ditë mbi 400 persona marrin trajtim dhe kujdes shëndetësor.
Sipas të dhënave të bëra publike nga QSUT, gjatë fundjavave numri i pacientëve rritet ndjeshëm, duke e bërë ritmin e punës edhe më intensiv për stafin mjekësor dhe infermieror.
Nën drejtimin e prof. dr. Edmond Zajmit, mjekët, infermierët dhe i gjithë personeli i Urgjencës Polivalente janë në shërbim 24 orë në ditë, 7 ditë në javë, duke ofruar asistencë të specializuar për pacientët që paraqiten në këtë strukturë.
Një nga shërbimet me ngarkesën më të lartë
Sipas QSUT-së, Urgjenca Polivalente mbetet një nga strukturat me ngarkesën më të madhe në sistemin spitalor universitar.
Çdo ditë, ekipet mjekësore përballen me një numër të konsiderueshëm pacientësh që paraqiten me problematika të ndryshme shëndetësore, duke kërkuar ndërhyrje të menjëhershme dhe kujdes të specializuar.
Pas çdo rasti të trajtuar qëndrojnë orë të gjata pune, përgjegjësi të mëdha dhe angazhim i vazhdueshëm i personelit shëndetësor për të garantuar shërbime cilësore dhe për të shpëtuar jetë.
Apel për qytetarët
Autoritetet shëndetësore u bëjnë thirrje qytetarëve të respektojnë rregullat dhe udhëzimet e Urgjencës, në mënyrë që ekipet mjekësore të përqendrohen tek pacientët që kanë nevojë për ndërhyrje të menjëhershme.
Respektimi i procedurave dhe përdorimi i duhur i shërbimeve të urgjencës konsiderohet i rëndësishëm për të garantuar trajtim në kohë dhe për të shmangur mbingarkesën e strukturave spitalore.
Urgjenca Polivalente e QSUT-së mbetet pika kryesore e referimit për rastet emergjente në vend, duke ofruar shërbim të pandërprerë për mijëra pacientë gjatë gjithë vitit.
