Ish-deputeti dhe ish-kandidati për Bashkinë Kuçovë, Lefter Maliqi, ka reaguar përmes një postimi në rrjetet sociale, duke i kërkuar Komisionit Qendror të Zgjedhjeve që të zhvillojë sa më shpejt mbledhjen dhe të marrë një vendim lidhur me mandatin e kryebashkiakut të Kuçovës, Kreshnik Hajdari.
Sipas Maliqit, mbledhja e planifikuar e KQZ-së është shtyrë me argumentin se kryetari i institucionit ndodhej jashtë vendit, ndërsa paralelisht, sipas tij, Hajdari kishte paraqitur një kërkesë për shtyrje të shqyrtimit të çështjes.
Në reagimin e tij, Maliqi pretendon se kryebashkiaku i Kuçovës prej tre vitesh po ndjek rrugë ankimimi në institucione dhe gjykata për të vonuar vendimmarrjen për mandatin e tij. Ai shprehet se vendimet e mëparshme gjyqësore dhe ato të organeve administrative duhet të zbatohen pa vonesa të mëtejshme.
Maliqi akuzon Hajdarin për shkelje ligjore dhe pretendon se po përpiqet të shmangë pasojat përmes proceseve të gjata ankimore. Ai paralajmëron se do të ndjekë të gjitha rrugët ligjore, duke përfshirë KQZ-në, KAS-in, SPAK-un dhe GJKKO-në, deri në përfundimin e çështjes.
Në fund të reagimit, ai shprehet i bindur se beteja ligjore do të përfundojë në favor të tij dhe se Bashkia Kuçovë duhet t’u rikthehet qytetarëve, duke e konsideruar këtë një hap të rëndësishëm për zhvillimin dhe ndryshimin e qytetit.
