Pamje tronditëse vijnë nga një shkollë në fshatin Thanë, njësia administrative Fiershegan në Bashkinë Lushnjë, ku nxënësit detyrohen të zhvillojnë mësimin në kushte që cenojnë rëndë shëndetin dhe sigurinë e tyre. Denoncimi është bërë publik nga deputeti i Partisë Demokratike, Saimir Korreshi, i cili ka shpërndarë një video nga ambientet e institucionit arsimor.
Në pamjet e publikuara shihen qartë tualete në gjendje të mjerueshme, jashtë çdo standardi higjieno-sanitar. Ato janë të degraduara, pa dyer dhe pa dritare, duke i bërë praktikisht të papërdorshme për nxënësit. Situata bëhet edhe më alarmante nga prania e gjarpërinjve në këto ambiente, çka e kthen shkollën në një vatër reale rreziku.
Gjendja e oborrit të shkollës e përkeqëson më tej panoramën, me mbeturina të shpërndara kudo, duke reflektuar mungesë totale mirëmbajtjeje dhe vëmendjeje institucionale.
Në reagimin e tij, Korreshi ironizon ashpër atë që e quan “reforma në arsim”, duke vënë në dukje hendekun e thellë mes deklaratave zyrtare dhe realitetit në terren. Ai e cilëson situatën si “ulëritëse”, ndërsa thekson se fëmijët në zonat rurale vazhdojnë të përballen me kushte të papranueshme.
“Kur thosha që kemi të bëjmë me qenefe, ju thonit ‘urdhëro se i keni’. Kjo është situata: qenef, banjo, ambient, gjarpërinj… Është ulëritëse! Faqe e zezë!”, shprehet deputeti në video.
Ky rast rikthen në vëmendje problematikat e thella të infrastrukturës arsimore në zonat rurale dhe ngre pikëpyetje serioze për ndërhyrjen e institucioneve përgjegjëse, ndërsa kërkohet reagim urgjent për garantimin e kushteve minimale për nxënësit.













