TIRANË – Grupi Parlamentar i Partisë Demokratike ka depozituar kallëzim penal ndaj Kryetarit të Kuvendit, Niko Peleshi, për kryerjen e veprës penale “Shpërdorim i detyrës”.
Sipas PD-së, shkak është bërë bllokimi i mbledhjes së Këshillit për Rregulloren, Mandatet dhe Imunitetin, lidhur me kërkesën e SPAK për arrestimin e zv.kryeministres Belinda Balluku. Grupi parlamentar demokrat ka bërë disa herë kërkesë për mbledhjen e Këshillit, por Peleshi nuk ka marrë masat për ta thirrur atë.
Këshilli u mbledh më 19 dhjetor 2025, ora 10:30, për shqyrtimin e kërkesës. Sipas PD-së, kryetari i Kuvendit ndërpreu mbledhjen në mënyrë arbitrare, pa vendimmarrje të Këshillit dhe pa caktuar datën e mbledhjes së radhës. Ai arsyetoi vendimin duke thënë se duhej t’u jepej kohë anëtarëve dhe palëve për t’u njohur me dokumentet e kërkesës së Prokurorisë.
PD e konsideron këtë veprim si shpërdorim të detyrës dhe ka depozituar kallëzimin penal përkatës në institucionet përkatëse.
