Policia Kufitare ka ndëshkuar me masë administrative 500 mijë lekë të rinj drejtuesin e një mjeti lundrues që shkeli perimetrin e sigurisë në zonën bregdetare të Borshit, duke rrezikuar jetën e pushuesve.
Sipas njoftimit zyrtar, gjatë patrullimeve në zonën e quajtur “Krorëz”, shërbimet e Policisë Kufitare konstatuan një mjet lundrues që kishte hyrë brenda perimetrit të sigurisë, në hapësirën ku pushuesit po laheshin.
Pas verifikimeve dhe kryerjes së procedurave administrative, ndaj drejtuesit të mjetit u vendos gjobë në vlerën 500 mijë lekë të rinj, ndërsa mjeti lundrues u bllokua.
Policia Kufitare bën apel ndaj të gjithë përdoruesve të mjeteve lundruese që të respektojnë perimetrat e sigurisë dhe rregullat e lundrimit, duke mos hyrë në zonat e rezervuara për pushuesit.
Autoritetet theksojnë se kontrollet përgjatë vijës bregdetare do të vijojnë me intensitet, me qëllim garantimin e sigurisë së pushuesve gjatë sezonit turistik.
