Për shkak të punimeve që do të kryhen në aksin rrugor “Librazhd–Korçë”, në fshatin Dragostunjë, autoritetet kanë njoftuar bllokim të përkohshëm të qarkullimit të automjeteve për tre net radhazi.
Sipas njoftimit zyrtar, nga data 03.02.2026 deri më 05.02.2026, aksi do të jetë plotësisht i pakalueshëm gjatë intervalit kohor 22:00 – 05:00, veçanërisht për mjetet e tonazhit të rëndë.
Kufizime dhe përjashtime
Gjatë orareve të bllokimit, do të lejohen të qarkullojnë vetëm autoambulancat, mjetet zjarrfikëse dhe ato të Policisë, për raste emergjente. Ndërkohë, pikat e kalimit kufitar janë njoftuar për të informuar drejtuesit e mjeteve të rënda mbi kufizimin e përkohshëm të qarkullimit.
Aksi alternativ për mjetet e vogla
Si rrugë alternative për automjetet e vogla, do të përdoret aksi:
“Maliq – Lozhan – Moglicë – Gramsh”, në drejtim të Tiranës dhe anasjelltas.
Policia në terren dhe apel për qytetarët
Shërbimet e Policisë do të jenë të pranishme në terren për menaxhimin e qarkullimit, garantimin e rendit dhe sigurisë rrugore.
Policia Rrugore e Elbasanit u bën thirrje drejtuesve të mjeteve për mirëkuptim, respektim të sinjalistikës dhe zbatimin e udhëzimeve të punonjësve të Policisë, si dhe për shmangien e lëvizjeve të panevojshme gjatë orareve të bllokimit.
Në rast nevoje apo për denoncimin e shkeljeve të rregullave të qarkullimit që sjellin ngadalësim apo bllokim të lëvizjes, qytetarët mund të telefonojnë numrin pa pagesë 112 ose të kontaktojnë shërbimet e Policisë në detyrë.
