Reshjet e dendura të ditëve të fundit kanë nxjerrë sërish në pah brishtësinë e infrastrukturës rrugore. Mesditën e sotme, në aksin Maliq–Lozhan, pranë fshatit Lozhan, një segment i konsiderueshëm i murit mbajtës është shembur, duke bllokuar plotësisht qarkullimin e automjeteve.
Sipas të dhënave paraprake, muri i rrëzuar kishte një gjatësi mbi 10 metra dhe një lartësi rreth 3 metra. Fatmirësisht, nuk raportohet për persona të lënduar, por situata ka qenë tejet e rrezikshme për drejtuesit e mjeteve që po qarkullonin në atë moment.
Në një komunikim telefonik me gazetarin Shkëlzen Henkoja, drejtuesi i mjetit, z. Erald Çarçiu, i cili udhëtonte nga Gramshi drejt Korçës, ka përshkruar momentin dramatik.“Pashë që muri po lëvizte dhe nuk po u besoja syve. Ndalova menjëherë automjetin dhe eca pak mbrapa. Vetëm pak sekonda më pas, muri u rrëzua plotësisht.”
Sipas tij, nëse nuk do të kishte reaguar në kohë, pasojat mund të kishin qenë tragjike.
Ngjarja ngre shqetësime serioze mbi sigurinë e këtij segmenti rrugor, sidomos në kushtet e reshjeve intensive që vijojnë prej disa ditësh. Drejtuesi i mjetit ka apeluar për kujdes të shtuar nga qytetarët, veçanërisht gjatë lëvizjeve në orët e natës, kur rreziku është edhe më i madh.
Njëkohësisht, ai u ka bërë thirrje institucioneve përgjegjëse që të ndërhyjnë menjëherë për sigurimin e zonës dhe rehabilitimin e murit mbajtës, për të shmangur incidente të tjera që mund të rrezikojnë jetën e qytetarëve.
Reshjet e fundit kanë shkaktuar problematika në disa akse rrugore, duke rikthyer në vëmendje nevojën për investime më të qëndrueshme dhe kontrolle të vazhdueshme në pikat kritike të infrastrukturës.
