Gjyqtarja Suela Xhani do të shqyrtojë padinë që lidhet me zgjedhjet e 23 majit për kryetarin e Partia Demokratike e Shqipërisë.
Xhani është përzgjedhur me short për të marrë në shqyrtim kërkesën e Mereme Sela, e cila iu drejtua Gjykata e Tiranës pasi u përjashtua nga gara.
Në padi, Sela pretendon se skualifikimi i saj është bërë me një vendim të paarsyetuar, pa motivim ligjor dhe në mungesë të transparencës procedurale, duke e konsideruar atë në shkelje të drejtpërdrejtë të të drejtave statutore dhe parimit të barazisë në konkurrim.
Ajo ngre gjithashtu shqetësimin për lejimin e kandidimit të Sali Berisha, duke argumentuar se bie ndesh me statutin e partisë, konkretisht me nenin 46, i njohur si “neni Basha”, që parashikon largimin e kryetarit pas humbjes së zgjedhjeve.
Në kërkesën e saj drejtuar gjykatës, Sela parashtron pesë pika kryesore:
- Shpalljen e pavlefshme absolute të vendimit për skualifikimin e saj nga gara;
- Detyrimin për rikthimin e saj në procesin zgjedhor;
- Shpalljen e pavlefshme të kandidimit të Sali Berishës;
- Konstatimin e shkeljeve të rënda të statutit dhe të parimeve të demokracisë së brendshme;
- Vendosjen e masës së sigurimit, me pezullimin e menjëhershëm të procesit zgjedhor të 23 majit 2026 deri në përfundim të shqyrtimit gjyqësor.
Vendimmarrja e gjykatës pritet të ketë ndikim të drejtpërdrejtë në vijimin ose jo të procesit zgjedhor brenda Partisë Demokratike.
