Kryeministri Edi Rama ka ndryshuar fotografinë e profilit në Facebook, duke vendosur një imazh të një flamingove, në një moment kur në vend po vijojnë prej rreth 25 ditësh protestat lidhur me projektin e planifikuar në zonën e Zvërnecit.

Ky ndryshim në profil ka tërhequr vëmendje në rrjetet sociale, pasi ndodh në kulmin e debatit publik për investimin e madh që pritet të realizohet në këtë zonë.

Reklame

Sipas protestuesve, zona e Zvërnecit është një territor i mbrojtur natyror, i njohur për biodiversitetin e saj dhe për praninë e shpendëve të rrallë, përfshirë flamingot, të cilët sipas tyre rrezikojnë të zhvendosen apo të zhduken nëse projekti zhvillohet në formën aktuale.

Protestat kanë hyrë në ditën e 25-të dhe janë shoqëruar me thirrje kundër projektit të investimit, të cilin qytetarët e konsiderojnë të dëmshëm për ekosistemin e zonës.

Deri tani nuk ka një reagim zyrtar nga Kryeministria lidhur me simbolikën e fotos së re në profilin e kryeministrit, e cila për disa është interpretuar si një mesazh i tërthortë në lidhje me debatin për zonën.

Debati për zhvillimet në Zvërnec vijon të mbetet një nga çështjet më të diskutuara në opinionin publik dhe politik gjatë ditëve të fundit.

Reklame