Sali Berisha prezantoi këtë të martë para Këshillit Kombëtar ekipin e ri drejtues të Partisë Demokratike, duke ftuar anëtarët të votojnë për Sekretarin e Përgjithshëm, nënkryetarët dhe sekretariatet e partisë. Gjatë fjalës së tij, Berisha tha se përbërja e re përfaqëson një kombinim të përvojës dhe ripërtëritjes.
“Në tërësi, ka një ripërtëritje, është bërë një bazuar më shumë në eksperienca dhe në praktikat e tyre“, deklaroi kreu i PD-së.
Megjithatë, momenti më i debatueshëm i mbledhjes ishte rikandidimi i Flamur Nokës për postin e Sekretarit të Përgjithshëm. Anëtarja e Këshillit Kombëtar, Ilirjana Kuçanaj, ndërhyri gjatë mbledhjes duke kërkuar shpjegime se përse Noka propozohej sërish për të njëjtin post.
Berisha iu përgjigj se çështja duhet të ndiqet sipas statutit të partisë.”Ilirjana, një minutë, të lutem, a mund të të kthej përgjigje apo jo? Ke komunikuar me mua sot, të kam kthyer përgjigje, të kam thënë ndiqe statutin. Asgjë nuk iu mohohet”, tha Berisha.
Pas mbledhjes, Kuçanaj kritikoi publikisht mënyrën e funksionimit të Partisë Demokratike, duke folur për atë që e quajti “mulizimi” i partisë.
“Ka ardhur momenti që PD të kthehet në meritokraci. Mulizimi është një fenomen që duhet luftuar. Kush do të bëjë karrierë në PD nuk mund të kalojë domosdoshmërisht nga zyra e Flamur Nokës”, deklaroi ajo para mediave.
Një zhvillim tjetër ishte kandidimi i deputetit Sajmir Korreshi përballë Flamur Nokës për postin e Sekretarit të Përgjithshëm. Vetë Korreshi tha se vendimi ishte marrë gjatë ditës.
“Është vendim i ditës së sotme. Nuk më detyron njeri. Nëse ka ardhur koha që të ndryshojë, do të ndryshojë”, u shpreh ai.
Në procesin e riorganizimit të strukturave drejtuese, Partia Demokratike do të ketë pesë nënkryetarë. Gazment Bardhi, në cilësinë e kryetarit të Grupit Parlamentar, dhe Agron Gjekmarkaj, si nënkryetar i Kuvendit nga opozita, do të vijojnë automatikisht në këto funksione, ndërsa tre nënkryetarët e tjerë do të zgjidhen me votim mes kandidatëve në garë.
Garë pritet edhe për drejtimin e sekretariateve. Mes emrave spikat kandidimi i deputetit Klevis Balliu për postin e sekretarit organizativ, përballë Agron Lokës.
Në fjalën përmbyllëse, Berisha u kërkoi demokratëve të vijojnë mbështetjen për protestën qytetare që po zhvillohet në Tiranë, duke e cilësuar atë si një angazhim të rëndësishëm të opozitës.
