Kreu i Partisë Demokratike, Sali Berisha, është ndalur sërish te resorti “Zig Zag” në Vuno, i sekuestruar pak ditë më parë nga SPAK në kuadër të hetimeve ndaj një grupi të dyshuar kriminal të përfshirë në trafikun e drogës.
Në një reagim në rrjetet sociale, Berisha ka lidhur çështjen e resortit me pretendimet për pronësinë e tokave në zonën e Vunos, duke deklaruar se kompleksi turistik ndodhet pranë pronave që, sipas tij, pretendohen nga kryeministri Edi Rama dhe fisi Koleka.
Kryedemokrati ka rikthyer në vëmendje edhe largimin nga detyra të ish-kreut të Kadastrës, Artan Lame, duke pretenduar se shkarkimi i tij erdhi vetëm pesë ditë pasi u publikua harta e tokave në Vuno.
Sipas Berishës, publikimi i kësaj harte lidhej me interesat pronësore në zonë dhe me ndërtimin e resortit “Zig Zag”, i cili ndodhet aktualisht nën sekuestro në kuadër të hetimeve të SPAK.
Berisha ka përmendur gjithashtu edhe emrin e Olsi Ramës, duke deklaruar se ai është “omniprezent në aksin Livadh-Jalë”, ndërsa i ka bërë thirrje Prokurorisë së Posaçme të thellojë hetimet.
“E vërteta e shkarkimit të Artan Lames: U dëbua vetëm 5 ditë pasi publikoi hartën e tokave në Vuno. Pse? Sepse resorti ‘Zig-Zag’ i bandave të drogës po ngrihet në kufi me pronat që pretendon Edi Rama e fisi Koleka. Olsi Rama është omniprezent në aksin Livadh-Jalë! Çfarë pret SPAK?”, shkruan Berisha në reagimin e tij.
Deri më tani nuk ka pasur një reagim nga Kryeministria, Olsi Rama apo institucionet e përmendura lidhur me këto pretendime. Ndërkohë, hetimet e SPAK për çështjen e resortit “Zig Zag” vijojnë.
