Ministri i Drejtësisë, Toni Gogu, deklaroi se projektligji për pagat e gjyqtarëve pritet të shqyrtohet në seancën plenare të 17 shtatorit.
Ngërçi për pagat e gjyqtarëve pritet të kalojë në Kuvend më 17 shtator. Ministri i Drejtësisë, Toni Gogu, deklaroi në Komisionin e Ligjeve se projektligji për pagat e gjyqtarëve do të shqyrtohet në seancën plenare të kësaj date.
Gogu u shpreh se Gjykata Kushtetuese ka përcaktuar se kompetenca për caktimin e pagave të gjyqtarëve i takon Kuvendit të Shqipërisë.
Sipas ministrit, kjo është një çështje që duhet të trajtohet nga institucioni përgjegjës, ndërsa ai nuk do të komentojë veprimet e institucioneve të pavarura të drejtësisë.“Magjistratët janë të pavarur, unë nuk jam për të komentuar veprime që bëjnë institucione të pavarura të shtetit shqiptar”, u shpreh Gogu.
Gogu: Kuvendi ka kompetencën për pagat
Ministri i Drejtësisë theksoi se Kuvendi duhet të zbatojë rendin e përcaktuar nga Gjykata Kushtetuese për pagat e gjyqtarëve.
“Kuvendi ka kompetencën, Gjykata Kushtetuese ka vendosur një rend, ka caktuar Kuvendin e Shqipërisë të përcaktojë pagën e gjyqtarit”, deklaroi ai.
Gogu foli gjithashtu për nevojën që standardet e përcaktuara të zbatohen edhe në ofrimin e shërbimeve në sistemin gjyqësor.
Deklarata e ministrit vjen në një moment kur çështja e pagave të gjyqtarëve është shoqëruar me përplasje institucionale. Më herët, një grup gjyqtarësh dhe drejtuesish gjykatash kanë depozituar kallëzim në SPAK lidhur me mënyrën e ekzekutimit të pagave dhe vendimeve gjyqësore.
Tashmë, vëmendja është te seanca plenare e 17 shtatorit, ku pritet të shqyrtohet projektligji që synon të përcaktojë kuadrin e pagave të gjyqtarëve.
Lexo edhe:
Ngërçi me pagat, 20 gjyqtarë kallëzojnë në SPAK ministrin Petrit Malaj
Gjykata Civile nis bojkotin/ Administrata proteston për pagat e papaguara
