Presidenti serb Aleksandër Vuçiç nuk ka vonuar dhe ka reaguar pas përplasjes diplomatike mes Tiranës dhe Beogradit, të nxitur nga deklaratat e tij për mundësinë e devijimit të rrjedhës së lumit Ibër.
Në një prononcim për RTS, Vuçiç e cilësoi projektin si një çështje të brendshme të Serbisë, ndërsa vuri në pikëpyetje përfshirjen e Shqipërisë në debat.
“Nuk e di se çfarë lidhjeje ka Ibri me Shqipërinë”, deklaroi Vuçiç.
Ai shtoi se “terrori po kryhet së bashku me organet e bashkësisë ndërkombëtare për të minuar çdo ditë institucionet e Serbisë në Kosovë dhe për të forcuar institucionet që nuk kanë lidhje me të drejtën ndërkombëtare dhe nuk janë themeluar në përputhje me normat e së drejtës publike ndërkombëtare”.
Përplasja mes Tiranës dhe Beogradit për Ibrin vjen vetëm pak ditë pasi dy vendet sinjalizuan përparim në negociatat për hapjen e zyrave konsullore në Shkodër dhe Bujanoc.
