Deputetja e Partisë Demokratike dhe kryetarja e Komisionit për Çështjet Europiane, Jorida Tabaku, ka reaguar pas publikimit të raportit të OSAC nga Departamenti Amerikan i Shtetit, duke ngritur shqetësimin për klimën e sigurisë dhe të biznesit në Shqipëri.
Tabaku e ka cilësuar raportin si një dokument që duhet të merret seriozisht nga institucionet shqiptare, pasi është hartuar si një udhëzues praktik për sektorin privat amerikan dhe për kompanitë që shqyrtojnë mundësinë për të investuar dhe operuar në Shqipëri.
Sipas deputetes demokrate, raporti evidenton një rritje prej rreth 17% të krimit të regjistruar, ndërsa problematikat e sigurisë kanë ndikim edhe në klimën ekonomike dhe në fenomenin e pastrimit të parave.
Tabaku: Shqetësimi kryesor është pasiguria institucionale
Tabaku argumenton se për investitorët e huaj, shqetësimi nuk lidhet vetëm me sigurinë fizike, por edhe me pasigurinë institucionale.
Sipas saj, korrupsioni në sistemin e drejtësisë, administratën publike dhe prokurimet publike, së bashku me mungesën e transparencës dhe konkurrencës, informalitetin dhe vështirësitë në zbatimin e kontratave, krijojnë pengesa për investimet.
“Korrupsioni, koordinimi i dobët ndërmjet institucioneve dhe një sistem drejtësie ende në zhvillim vazhdojnë të pengojnë zbatimin e ligjit. Pandëshkueshmëria e personave me pushtet politik dhe ekonomik mbetet një shqetësim serioz”, shprehet Tabaku.
Ajo thekson se këto problematika mund të jenë veçanërisht të ndjeshme në sektorë si infrastruktura rrugore dhe energjetika, ku investimet lidhen me prokurimet publike, lejet shtetërore, kontratat afatgjata dhe vendimmarrjen politike.
Tabaku: Investimet vijnë aty ku ka konkurrencë të barabartë
Deputetja e PD-së ka deklaruar se investimet e huaja tërhiqen nga vendet ku zbatimi i ligjit është i garantuar dhe ku bizneset konkurrojnë në kushte të barabarta.
“Investimet vijnë atje ku konkurrenca është e barabartë, prokurimet janë transparente, drejtësia garanton zbatimin e kontratave dhe askush nuk qëndron mbi ligjin”, shprehet ajo.
Sipas Tabakut, investitorët duhet të kenë mundësi të hyjnë në treg pa pasur nevojë për lidhje politike, por duke u mbështetur në një mjedis të qëndrueshëm dhe konkurrues.
Akuzat ndaj qeverisë
Në reagimin e saj, Jorida Tabaku ia ka atribuar qeverisjes socialiste atë që ajo e cilëson si stanjacion ekonomik dhe institucional në vend.
“Shqipëria vazhdon të mbetet në të njëjtin stanjacion për shkak të sistemit që kanë ngritur socialistët”, deklaron Tabaku, duke kërkuar një ndryshim të modelit të zhvillimit ekonomik.
Ajo ka argumentuar se vendi ka nevojë për një model ekonomik që forcon sundimin e ligjit, konkurrencën e lirë dhe transparencën.
“Shqipëria ka nevojë për një model zhvillimi që nuk ushqen pastrimin e parave, por ndërton një ekonomi tregu larg monopoleve dhe pranë konkurrencës së lirë”, përfundon Tabaku.
Raporti i OSAC dhe vlerësimet e tij për sigurinë dhe klimën e biznesit pritet të vijojnë të jenë pjesë e debatit publik mbi kushtet që Shqipëria ofron për investitorët e huaj.
Lexo edhe:
Lamallari: Shqipëria në nivelin më të ulët historik të vrasjeve me dashje
Raporti i DASH ngre alarmin: Shqipëria nën hijen e krimit të organizuar dhe korrupsionit!
