Është zbardhur dëshmia e Rozalinda Plakës, ish-të fejuarës së Refit Buzit.
35-vjeçari vrau prindërit e saj, Kosta dhe një tjetër familjar, dhe më pas mori peng ish-partneren për disa orë. Ngjarja e rëndë ndodhi në fshatin Vidhisht të Fierit.
Pas negociatave me policinë, Rozalinda u lirua. Ndërkohë, Refit Buzi i dha fund jetës brenda automjetit.
Në dëshminë e saj, Rozalinda ka rrëfyer marrëdhënien me Buzin. Ajo ka treguar edhe momentet e frikshme të sulmit dhe pengmarrjes.
Rozalinda: U ndamë në vitin 2024
Sipas dëshmisë, lidhja mes Rozalinda Plakës dhe Refit Buzit kishte nisur disa vite më parë.
Çifti kishte shpallur fejesën në vitin 2020. Ata kishin krijuar edhe marrëdhënie familjare.
Rozalinda ka deklaruar se marrëdhënia vijoi deri në vitin 2024. Në atë periudhë, ajo vendosi të ndahej.
Sipas saj, Buzi nuk e kishte pranuar ndarjen.
“Në vitin 2020 kemi shpallur fejesën dhe kemi krijuar hyrje-dalje familjare. Lidhja jonë ka vazhduar deri në vitin 2024, kohë në të cilën unë kam kërkuar të ndahem nga ai, por Refiti nuk ka pranuar”, ka deklaruar ajo.
Rozalinda ka treguar edhe arsyet që e çuan drejt vendimit për t’u ndarë.
“Ai kishte një jetë të çrregullt, nuk ishte i përqendruar te lidhja jonë, kishte qenë jashtë shtetit në burg dhe të gjitha këto nuk më përshtateshin mua”, ka rrëfyer ajo.
Sipas dëshmisë, prindërit e saj ishin në dijeni të problemeve në marrëdhënie.
“Këto gjëra i dinin edhe prindërit e mi, të cilët nuk kanë qenë dakord për këtë lidhje që në fillim”, ka deklaruar Rozalinda.
Rozalinda rrëfen momentin e sulmit
Në dëshminë e saj, Rozalinda ka treguar edhe momentin kur ndodhi sulmi në banesë.
Ajo ka deklaruar se ishte duke fjetur në dhomën e saj.
Prindërit e saj ndodheshin në dhomën tjetër.
“Kam qenë duke fjetur gjumë në dhomën time, kurse prindërit e mi kanë qenë në dhomën e tyre. Kam dëgjuar zhurmë të fortë që më është dukur si krismë arme dhe kam dalë në korridor të shikoj se çfarë kishte ndodhur”, ka rrëfyer ajo.
Sipas dëshmisë, në korridor ajo ka parë Refit Buzin me armë në dorë.
Ndërkohë, babai i saj, Kosta Plaka, ndodhej i shtrirë në tokë.
“Kur dola kam parë shtetasin Refit Buzi në korridor, me një armë të gjatë si ato të gjahut në dorë. Kam parë babain tim Kosta Plaka të shtrirë përmbys te hyrja e dhomës, i mbuluar me gjak”, ka deklaruar ajo.
“Do t’ju vras të gjithëve”
Rozalinda ka treguar se ka tentuar t’i marrë armën Buzit.
Sipas saj, situata është përshkallëzuar menjëherë.
“Unë i kam kapur armën dhe po e mbaja, por Refiti bërtiste: ‘Do t’ju vras të gjithëve’”, ka rrëfyer ajo.
Më pas, sipas dëshmisë, Buzi e ka shtyrë dhe e ka goditur me grusht.
Ai ka thyer edhe derën e dhomës së saj.
Rozalinda ka deklaruar se është plagosur nga copat e xhamit.
Si u mor peng Rozalinda
Pas sulmit në banesë, Rozalinda është marrë me forcë nga Refit Buzi.
Ajo ka treguar se u nxor nga shtëpia dhe u fut në automjet.
“Më mori me forcë e më hipi te makina. Momenti kur më mori me forcë nga shtëpia deri kur kam hipur në makinë nuk më kujtohet, sepse kam qenë shumë e tronditur”, ka deklaruar ajo.
Më pas, Buzi u izolua në automjet bashkë me ish-partneren e tij.
Pengmarrja zgjati për disa orë. Gjatë kësaj kohe, policia zhvilloi negociata për lirimin e 24-vjeçares.
Detaji i këpucëve gjatë negociatave
Gjatë negociatave me policinë është zbuluar edhe një detaj tjetër.
Sipas dëshmisë së Rozalindës, Refit Buzi ishte zbathur.
Ajo ka treguar se gjatë komunikimit me autoritetet, prokurori e ka pyetur përse ishte pa këpucë.
“Vetëdorëzohu, pse je zbathur?”, e ka pyetur prokurori.
Sipas dëshmisë së Rozalindës, Buzi është përgjigjur:
“I hoqa, ia dhashë… Ia dhashë asaj t’i veshë, se e mora zbathur.”
Pas negociatave, Rozalinda Plaka u lirua.
Ndërkohë, Refit Buzi nuk pranoi të dorëzohej dhe i dha fund jetës brenda automjetit.
Hetimet për tragjedinë vijojnë
Ngjarja e rëndë vijon të jetë nën hetim.
Autoritetet po punojnë për zbardhjen e plotë të rrethanave dhe motiveve që çuan në këtë tragjedi.
Dëshmia e Rozalinda Plakës pritet të jetë një nga elementët e rëndësishëm të hetimit për të dokumentuar dinamikën e ngjarjes.
Lexo edhe:
Prindërit e Refit Buzit rrëfejnë konfliktet para ngjarjes në Fier: “I dërgonte para nga Anglia”
Pamjet nga momenti kur RENEA rrethon automjetin e Refit Buzit pas ngjarjes së rëndë në Fier
