Një aksident i rëndë me pasojë vdekjen është regjistruar në aksin rrugor Pogradec–Qafë Thanë, pranë fshatit Pojskë. Viktima është 32-vjeçari Amarildo Islamaj nga Vlora, i cili humbi kontrollin e automjetit dhe u përplas me barrierat mbrojtëse të rrugës. Si pasojë e përplasjes, ai humbi jetën në vend, ndërsa një pasagjer mbeti i plagosur rëndë.
Një tjetër aksident fatal është shënuar në rrugët e vendit këtë të martë. Ngjarja ndodhi në aksin nacional Pogradec–Qafë Thanë, në afërsi të fshatit Pojskë.
Sipas të dhënave paraprake, drejtuesi i automjetit, Amarildo Islamaj, 32 vjeç, banues në Vlorë, ka humbur kontrollin e mjetit, i cili është përplasur me barrierat mbrojtëse në të dy anët e rrugës.
Përplasja ka qenë tepër e fortë, duke i shkaktuar shoferit dëmtime fatale. Pavarësisht ndërhyrjes së shërbimeve të emergjencës, 32-vjeçari nuk ka mundur t’u mbijetojë plagëve.
Si pasojë e aksidentit ka mbetur i plagosur rëndë edhe një pasagjer që udhëtonte në të njëjtin automjet. Ai është transportuar në spital, ku po merr ndihmë mjekësore.
Gjendja e tij shëndetësore nuk është bërë ende e ditur nga autoritetet.
Në vendngjarje kanë mbërritur shërbimet e Policisë, të cilat kanë kryer veprimet procedurale dhe kanë nisur hetimet për të përcaktuar shkaqet dhe rrethanat e plota të aksidentit.
Paraprakisht dyshohet se humbja e kontrollit të automjetit ka qenë shkaku i përplasjes, por hetimet vijojnë.
Vetëm pak minuta pas kësaj ngjarjeje, një tjetër aksident u regjistrua në aksin rrugor Qafë Pllocë–Qukës, ku u plagos drejtuesi i një fugoni.
Autoritetet po hetojnë edhe këtë ngjarje, ndërsa bilanci i aksidenteve në zonën juglindore gjatë ditës së sotme është rënduar ndjeshëm.
