Numri i studentëve të dyshuar të helmuar pas konsumimit të ushqimit në Akademinë e Sigurisë ka shkuar në 64 persona, pas shtimit të rasteve të reja që janë paraqitur me simptoma të ngjashme në urgjencë.
Fillimisht u raportuan 60 kursantë, ndërsa më pas edhe 4 studentë të tjerë janë paraqitur me të njëjtat shqetësime shëndetësore, duke ngritur dyshime për një problem të përsëritur me ushqimin e konsumuar në institucion.
Hetimet e policisë dhe prokurorisë
Policia dhe Prokuroria e Tiranës po vijojnë hetimet për të përcaktuar shkaqet e plota të ngjarjes, ndërsa dosja e re pritet të bashkohet me rastin e mëparshëm të helmimit të raportuar në fillim të muajit maj të këtij viti.
Grupi hetimor po analizon të gjitha rrethanat, përfshirë zinxhirin e furnizimit me ushqim dhe kushtet e ruajtjes së produkteve të konsumuara nga studentët.
Nën hetim kompania e kateringut dhe AKU
Hetimet janë shtrirë edhe ndaj kompanisë SORI-AL, e cila ka pasur kontratë kateringu me Akademinë e Sigurisë. Sipas burimeve hetimore, po verifikohet nëse janë respektuar standardet e sigurisë ushqimore dhe procedurat e furnizimit.
Paralelisht, nën verifikim është vendosur edhe Autoriteti Kombëtar i Ushqimit (AKU), për të përcaktuar nëse janë kryer kontrollet e nevojshme pas rikthimit të aktivitetit të kompanisë në institucion.
Marrja në pyetje e administratores
Sot pritet të merret në pyetje edhe administratorja e kompanisë, Alma Tafani, e cila ndodhet nën hetim në gjendje të lirë pas incidentit të parë të raportuar më herët.
Në pritje të analizave laboratorike
Grupi hetimor është ende në pritje të rezultateve të analizave të mostrave të ushqimit të marra nga AKU. Këto rezultate pritet të jenë vendimtare për përcaktimin e shkakut të helmimit dhe për identifikimin e përgjegjësive ligjore.
