Kuvendi i Shqipërisë po përgatitet të krijojë një televizion parlamentar, përmes një pakete investimesh që kap vlerën mbi 98 milionë lekë. Projekti parashikon ngritjen e një infrastrukture të plotë mediatike, që përfshin teknologji të inteligjencës artificiale, studio televizive moderne dhe një platformë të integruar për transmetimin e veprimtarisë parlamentare.
Sipas dokumenteve zyrtare, 18.3 milionë lekë janë planifikuar për sistemin e transkriptimit Audio-Video të bazuar në Inteligjencë Artificiale, i cili do të përdoret për përpunimin dhe arkivimin automatik të seancave parlamentare. Ndërkohë, 50.2 milionë lekë do të shpenzohen për ngritjen e Media Hub-it të Kuvendit, një strukturë me shërbime të integruara AI që do të funksionojë si një redaksi televizive brenda institucionit.
Këtyre shpenzimeve u shtohen edhe rreth 30 milionë lekë për blerjen e pajisjeve teknologjike dhe mobilimin e ambienteve. Në total, investimi arrin në 98.5 milionë lekë, pa përfshirë shpenzime të tjera operative që mund të lindin gjatë zbatimit të projekteve.
Sipas planit, Media Hub-i i Kuvendit do të funksionojë në bashkëpunim me Radio Televizionin Shqiptar (RTSH), duke ofruar transmetime live të seancave plenare dhe komisioneve, kronika informative, përmbajtje analitike dhe materiale edukative. Platforma synon të jetë shumëplatformëshe, duke u ofruar qytetarëve mundësinë të ndjekin punën parlamentare përmes televizionit dhe kanaleve digjitale.
Zyrtarisht, ky investim argumentohet me nevojën për rritjen e transparencës, modernizimin e komunikimit institucional dhe afrimin e Kuvendit me publikun. Megjithatë, shifra e konsiderueshme dhe krijimi i një televizioni të vetë Parlamentit pritet të nxisin debat publik, veçanërisht në një kohë kur media publike përballet me vështirësi financiare dhe probleme institucionale.
Debati ka marrë edhe ngjyrime politike, ku përfaqësues të opozitës kanë ironizuar projektin dhe mënyrën e përdorimit të fondeve publike, duke vënë në pikëpyetje prioritetet e Kuvendit dhe rolin e tij në tregun mediatik.
