Policia e Shtetit ka reaguar pas mesazhit elektronik që u është dërguar disa institucioneve në Shqipëri, me kërcënime për vendosjen e lëndëve shpërthyese dhe kryerjen e akteve terroriste.
Sipas njoftimit zyrtar, nga verifikimet paraprake rezulton se emaili është dërguar nga një adresë elektronike që i përket një institucioni arsimor në Arabinë Saudite.
Policia bën me dije se mënyra e dërgimit të këtij mesazhi ngjason me raste të mëparshme, kur kërcënime të ngjashme janë dërguar nga adresa elektronike të komprometuara, të cilat u përkisnin studentëve të institucioneve arsimore jashtë vendit.
Megjithatë, origjina e saktë e mesazhit dhe autenticiteti i kërcënimeve mbeten objekt verifikimi.
Strukturat e Policisë së Shtetit po kryejnë veprimet e nevojshme hetimore për të zbardhur rrethanat e rastit, për të përcaktuar burimin e mesazhit dhe për të identifikuar personat përgjegjës për dërgimin e tij.
Më herët, raportimet për kërcënimin kanë bërë me dije se Gjykata dhe Prokuroria e Fierit janë evakuuar, ndërsa në zonë është shtuar prania e forcave të Policisë.
Deri në përfundimin e verifikimeve, autoritetet nuk kanë konfirmuar nëse kërcënimi është real apo nëse bëhet fjalë për një mesazh të dërguar nga një adresë e komprometuar.
Lexo edhe
Email me kërcënime për bombë në Kryeministri, ministri dhe institucione drejtësie
