Një mesazh kërcënues me pretendimin se në një ndërtesë ishte vendosur një mjet shpërthyes dhe me referenca ndaj vendosjes së Sheriatit në Shqipëri ka ngritur pikëpyetje mbi sfondin dhe autorësinë e tij. Mesazhi është publikuar nga A2 CNN, ndërsa burime jozyrtare i kanë deklaruar Tempull.com se një person me lidhje të pretenduara me Shërbimin Informativ mund të jetë i përfshirë në dërgimin e tij.
Ky është mesazhi i publikuar nga A2CNN
Ju njoftojmë urgjentisht se në këtë moment brenda ndërtesës është vendosur një mjet shpërthyes që përmban nitrat amoni (ANFO). Sot, me lejen e Allahut, do të kryejmë një seri sulmesh terroriste të planifikuara në territorin e vendit. Ajo që do të përjetoni sot është vetëm fillimi. Një ditë, qeveria juaj do të dorëzojë pushtetin dhe do të vendoset Sheriati”
Sipas këtyre burimeve, ekziston dyshimi se mesazhe të tilla mund të përdoren për të ushqyer një narrativë që i paraqet trazirat në Shqipëri si të lidhura me Vëllazërinë Myslimane dhe me synimin për vendosjen e Sheriatit. Sipas të njëjtit version, një narrativë e tillë do t’i shërbente qeverisë shqiptare në komunikimin me partnerët ndërkombëtarë, duke i paraqitur zhvillimet e brendshme jo thjesht si krizë politike, por si kërcënim ekstremist.
Megjithatë, deri në këtë fazë nuk ka prova të verifikuara që të vërtetojnë autorësinë e mesazhit, përfshirjen e ndonjë punonjësi të Shërbimit Informativ apo ekzistencën e një operacioni të organizuar për të ndërtuar këtë narrativë. Këto mbeten dyshime që kërkojnë verifikim dhe jo përfundime të provuara.
Pyetja që shtrohet është thelbësore: kush e ka dërguar mesazhin, çfarë synimi ka pasur dhe a po përdoret realisht kërcënimi për të ndikuar perceptimin ndërkombëtar mbi situatën politike në Shqipëri? A po mashtron Ambasadën Amerikane qeveria shqiptare?
Përgjigjet kërkojnë hetim të pavarur, verifikim teknik të origjinës së mesazhit dhe transparencë nga institucionet përgjegjëse. Nëse kërcënimi është real, autorët duhet të identifikohen dhe të mbajnë përgjegjësi. Nëse mesazhi është përdorur për të krijuar artificialisht një perceptim të caktuar politik, atëherë çështja do të kishte një rëndësi edhe më të madhe publike.
Lexo edhe
Email me kërcënime për bombë në Kryeministri, ministri dhe institucione drejtësie
Email kërcënues në emër të “Milicisë Serbe” për bombë dhe vrasje, mesazhi rezulton fals
